મહેસાણા : રાજ્યની એન્ટી કરપ્શન બ્યુરો (એ.સી.બી.)એ મહેસાણા કલેક્ટર કચેરીના રેવન્યુ ક્લાર્ક વિશ્વજીત ખેંગારભાઈ કમલેકરને 9 લાખની લાંચ સ્વીકારતા રંગેહાથે ઝડપી પાડ્યો છે. પ્રાથમિક મળતી માહિતી મુજબ, એક જાગૃત નાગરિકે પોતાની ખેતીની જમીનને બિનખેતી (N.A.)માં રૂપાંતર કરવા માટે મહેસાણા કલેક્ટર કચેરીમાં અરજી કરી હતી. આ પ્રક્રિયામાં આરોપી ક્લાર્કે એક ચોરસફૂટ દીઠ 50 મુજબ કુલ 23 લાખની લાંચની માંગણી કરી હતી. પછી રકઝક બાદ માંગણી 12 લાખ અને ત્યારબાદ 10 લાખ સુધી નક્કી કરવામાં આવી હતી અને થોડી વધઘટ બાદ અંતે બંને વચ્ચે 9 લાખની લાંચની ડીલ નક્કી થઈ ગઈ હતી. ફરીયાદીએ આ બાબત અંગે લાંચ આપવા ઇન્કાર કરી એ.સી.બી.નો સંપર્ક કર્યો હતો. એ.સી.બી. દ્વારા 4 ઓક્ટોબર, 2025ના રોજ આરટીઓ સર્કલ પાસે, સુભાષ બ્રીજ નજીક જાહેર માર્ગ પર ટ્રેપ ગોઠવવામાં આવ્યો હતો. જે છટકામાં આરોપી વિશ્વજીત કમલેકરે ફરીયાદી પાસેથી 9 લાખની લાંચની રકમ સ્વીકારી લેતા જ એ.સી.બી.ની ટીમે તેને રંગેહાથે ઝડપી લીધો હતો. આ ટ્રેપનું નેતૃત્વ પોલીસ ઇન્સ્પેકટર શ્રી એસ.એન. બારોટ (ફિલ્ડ-3, ઇન્ટેલિજન્સ વિંગ, એ.સી.બી. અમદાવાદ)એ કર્યું હતું, સાથે પોલીસ ઇન્સ્પેકટર શ્રી ડી.બી. મહેતાનો સહયોગ રહ્યો હતો. એ.સી.બી. દ્વારા આરોપી સામે ભ્રષ્ટાચાર અધિનિયમ હેઠળ ગુનો નોંધાઈ આગળની કાર્યવાહી હાથ ધરવામાં આવી છે.
પ્રકાશિત નિતેશ ગોર – ભૂજ
અહેવાલ આનંદ પરમાર બનાસકાંઠા દ્વારા : 9824346387
