લાંબા સમય બાદ ભુજની સરકારી કચેરીમાં ભ્રષ્ટાચાર વિરોધી બ્યુરો (ACB)ની કાર્યવાહીથી રેવન્યુ વિભાગમાં ભારે ચર્ચા અને ચકચાર મચી છે. ભુજ શહેર મામલતદાર કચેરીમાં ફરજ બજાવતા રેવન્યુ તલાટી વર્ગ-3, ચંદુ ગેલાભાઈ હરણ (ઉં.વ. 34)ને ખેડૂત ખાતેદારનો દાખલો કાઢી આપવા બદલ રૂ. 35,000/- ની લાંચ સ્વીકારતા ACBએ રંગેહાથે ઝડપી પાડ્યા હતા. પ્રાપ્ત વિગતો મુજબ, ફરિયાદીની વડીલોપાર્જિત જમીનનું વેચાણ થયા બાદ તેમની પાસે અન્ય કોઈ ખેતીની જમીન બાકી રહી નહોતી. ખેડૂત ખાતેદારનો દરજ્જો યથાવત રાખવા માટે જરૂરી દાખલો મેળવવા અરજી કરવામાં આવી હતી. આ કામ કરવા માટે શરૂઆતમાં રૂ. 40,000/- ની માંગણી કરવામાં આવી હતી, જે બાદ રકઝક પછી રૂ. 35,000/- નક્કી થયા હોવાનું ફરિયાદમાં જણાવાયું હતું. ફરિયાદી લાંચ આપવા ઇચ્છતા ન હોવાથી તેમણે ભુજ ACBનો સંપર્ક કર્યો હતો. ફરિયાદના આધારે ગોઠવાયેલા છટકામાં આરોપી તલાટીએ ફરિયાદી પાસેથી રૂ. 35,000/- ની લાંચ સ્વીકારતા જ ACBની ટીમે તેમને પ્રાંત અને મામલતદાર કચેરીના પરિસરમાંથી રંગેહાથે ઝડપી લીધા હતા. ACBએ લાંચની સમગ્ર રકમ કબજે કરી આરોપી સામે કાયદેસરની કાર્યવાહી શરૂ કરી છે. આ સમગ્ર કાર્યવાહી સુપરવિઝન અધિકારી કે.એચ. ગોહિલના માર્ગદર્શન હેઠળ ભુજ ACBના જે.જે. ચૌધરીની ટીમે હાથ ધરી હતી.
